Gen
21
2011

GERUSALEMME LIBERADA (Cantu primu "1")

Scritto da Salvatore Ultimo aggiornamento (30 Gennaio 2011)
PDFStampaE-mail

 

Deus bidet sas inzertesas de sos cristianos già a su terzu annu de sa prima crociada (1099) e mandat s’arcangelu Gabriele dai Goffredu pro chi aunet totus sos capos.

Interventu de Pedru s’eremita a s’assemblea de Tortosa; Goffredu est eleggidu comandante supremu. Passat in rassegna sas truppas e si tuccat versu Jerusalemme. Su re Aladinu però postu in avvisu, garrigu de fele inferit contra sos cristianos presentes in sa tzittade e faghet rinforzare sas fortificazione de Jerusalemme.

 

CANTU PRIMU

 

I.

 

Canto sas armas e su capitanu

chi libereit su sepulcru ‘e Cristu,

tantu peneit cun sinnu e cun sa manu,

meda suffreit in su gloriosu achistu.

S’inferru si oppenzeit ma invano

s’armeit s’oriente a populu mistu.

Goffredu chi retzeit sos signor santos,

auneit a isse totu sos ispaltos.

 

II.

Oh Musa, tue chi de fozas de laros

no chinghes pius sa fronte d’Elicona,

ma in su chelu cun biados caros

de istellas immortales has corona.

Ispira a mente mia sos imparos

su cantu meu isgiara e tue perdona

si meda veridades hapo a parte

ma no de sos dilettos de cust’arte.

 

III.

Tue ischis chi addae in logos zertos

de sas durchesas imbozzas Parnasu

chi a narrer beru, in mesu a moddes versos

paritzos cun promissas has persuasu.

Comente a su pitzinnu dan’aspersos

medicamentos trampados in vasu,

chi durches parene a s’ingullida

ma dai s’ingannu nde retzin sa vida.

 

IV.

D’animu mannu Alfonsu, chen’imbroglios

a furore ‘e fortuna ghiat in portu,

deo, pellegrinu errante in sos iscoglios

e in undas agitadas gasi assortu.

In fronte tua regogli custos foglios

chi sun sagrados e sun pro cunfortu.

Forsi una die s’ammonidora pinna

s’hat attrivire a iscrier su ch’atzinna.

 

 

.

 

V.

Rejone ‘ona si ponzeit in paghe

su populu de Cristu in donzi logu.

Naves e caddos su ferinu Traghe,

su ch’hat furadu torret chena isfogu

a Buglione s’iscettru e su tenaghe

de terra e mare imperu e cunsolu,

a isse li cumpetit, nostra Carma,

intantu ascultat e aparittzat s’arma.

 

VI.

Est già su sestu annu ch’in oriente

passeit campu Cristianu atera impresa

e Nicea, pro s’assaltu e i sa potente

Antiochia, haian leadu cun altesa.

Posca in battaglia incontrada zente

de Persia, innumerabile difesa

e Tortosa, ispunzada a sa noa

istajone aisettende atera proa.

 

VII.

A su finire ‘e su pioosu ierru

donzi azione tzessare devera.

Cando da e s’Altu su Babbu Eternu

in sa parte pius alta e pius sinzera,

e cantu est da istellas basciu inferru

tantu est pius altu in s’isteddada ispera,

ojos in basciu a unu puntu e in una

vista, mireit su chi su mundu auna.

 

VIII.

Mireit totu sas cosas e in Siria

s’abbizzat in prinzipios cristianos

cun cuss’ojada sua ch’intro ispia(t)

in sos segretos de affettos umanos.

Bidet Goffredu chi ogare cheria(t)

dae sa tzittade Santa empios paganos,

pienu de fide e zelu onzi mortale

tesoru, imperu e gloria no est tale.

 

IX.

De Baldovinu ‘ideit cupidu inzegnu

ca a sa mannesa umana isse aspirat,

bidet Tancredi de sa brama indegnu

tantu su vanu amore lu martirat,

e a fundare Beomondo nou regnu

sou, de Antiochia a guvernu mirat

e dare noas legges e costumes

e arte e cultu dignu ‘e veros numes.

 

X.

Interrendesi tantu in su pensieru

chi atera impresa no l’’enit a mente

bidet Rinaldu de animu gherreru

cun ispiritu ‘e reposu impotente.

No est bramosu pro ricchesa e imperu

ma de onore sas bramas ardentes,

bidet che da e sa ‘ucca intantu pendet

dai Guelfu, sanos esempios apprendet.

 

XI.

Posca chi happeit cumpresu sos umores

e sos sanos sensos su Re ‘e su mundu

a Isse giamat tra sos isplendores

Gabriele, chi ‘e sos primos fit segundu,

de Deus est de sas animas mazzores

nunziu filele intrepete giocundu

e sutta, in sos segretos de su chelu

giughet de sos mortales bonu e zelu.

 

XII.

Li neit, como dai Goffredu anda

e a nome meu nara proite tzessa’?

Sos suos proite in guerra isse no manda’

e liberat Jerusalemme oppressa.

Giamet sos duces, cunsiza e cumanda

chi capitanu siat de s’alta impresa.

Deo l’eleggo e ateros in terra

li sian cumpanzos, ministros de gherra.

 

XIII.

Gasi li neit, e Gabriele andeit

a eseghire sas cosas impostas,

de aria sa sua forma inghirieit

ma a su sensu mortale suttapostas,

de aspettos umanos si cueit

ma de maestade celeste cumpostas.

Tra zovine e piseddu annos confine

orneit de rajos su brundu sou crine.

 

XIV.

Chimas e alas nidas de oro fine

bene ispartas agiles e prensas

in nues e bentos andeit sublime

subra ‘e sa terra ‘oleit cun alas tesas,

gasi bestidu in attesu cunfine

de mundu, messazeru ‘e celestesas.

In su Libanu monte dae sas dunas

s’alzeit in altu cun sas giustas pumas.

 

XV.

S’ispiaggia de Tortosa, posca ‘ida

faleit a giosso a bolu adderettadu,

e in sos lidos noos a s’avreschida

parteit dai fora in sas undas cuadu.

Bideit Goffredu in preghiera dechida

in manzanada comente abituadu.

Cando comente sole e pius lughente

s’anghelu appareit da e Oriente.

 

XVI.

Li neit, accò cust’est s’ora opportuna

pro sa gherra, pius no tue aisetta,

e tando, anda in timoria peruna

Jerusalemme libera, suggetta.

Sos prinzipes a tie totu auna,

sos indezisos pro s’obera appretta.

Deus elettu t’hat duce de issos

e in voluntade a tie sian suttammissos.

 

XVII.

Mi mandat Deus e ti fatto revelu,

lumine e mente Sua de ispera tanta

d’haer s’alta vittoria e tantu zelu,

a tie cumbenit e s’Europa incanta.

Poi, mudu mudu isparit in su chelu

in sa serena parte pius alta,

resteit Goffredu sustu in s’isplendore

oji illuinadu e mente in ajubore.

 

XVIII.

Abbizzadu s’est como in su discurrer

dai Deus mandadu anghelu predilettu

già giughet brama ardente de imporrer

fine a sa gherra ca isse est Duce elettu

dae su chelu ‘idendesi proporrer

già s’ambizione li unfiat su pettu

ed in su cherrer sou s’infiamat brama

de su Segnore ischentidda e fiama.

 

XIX.

In tota presse sos eroes cumpanzos

chi fin ispaltos giamat a radunu

sas litteras aumentat e messazos,

sempre in preghiera ed in cunsizu sunu.

S’anima eletta e su guvernu e istranzos

ch’ischidan sa virtude tot’a unu.

Totu paret ch’acciappet gherra e paghe

paret de gloria adornu e li piaghe(t).

 

 

 

XX.

Benzein sos Duces e ateros ancora

solu Boemondo in su postu mancheit.

Parte attendados intro parte fora

Tortosa in sos albergos suos tenzeit.

Sos mannos de sa guerra unidos ora

(gloriosu Senatu) sa die s’uneit.

Goffredu inoghe cominzeit tra issos

sermones e cantos a Deus promissos.

 

XXI.

Gherreru ‘e Deu chi a recreare dannos

de sa fide ‘e su Re de chelu elettu

seguros cun sas armas e ingannos

de terra e mare ghiande a su trettu.

Emmo già nd’hamus bidu in tantos annos

ribellantes provincias de dilettu

ammasettende zente cun sa gloria

ponzende insigna e nome a sa vittoria.

 

XXII.

Già nos lassemus durche pegnu e nidu

nadiu (si su creer meu no erra’)

in ue sa vida esposta a mare infidu

e a sos periglios de sa santa gherra

pro achistare in pagu sonu e gridu.

Su possessu ‘e custa barbara terra

no balet ca propostu han s’iscartu

in donu ‘e s’anima e samben ispaltu.

 

XXIII

Ma fit de pensar nostru ultimu signu

de Sionne ispunzare donzi muru

e a sos cristianos finet giogu indignu

de servidude dispiaghente e duru

fundende in Palestina nou regnu

in ue piedade happat logu seguru,

ne a pellegrinu si neghet devotu

s’adoru ‘e su Sepulcru a isolver votu.

 

XXIV.

Duccas su fattu a rischiu ‘e risultadu

pius de su travagliu e onore in giogu

nudda a cunfromma s’est bidu e ‘ortadu

s’impetu ‘e armas in ateru logu.

Goset s’Europa chi hat accordadu

s’isforzu fattu ‘e ponner s’Asia a fogu

ca in bona sorte bidemus sa fine

de regnos e ruinas su confine.

 

XXV.

No edificat chie cheret sos imperos

in fundamentas, fabbricas mundanas

ue pagos sun fidentes istranieros

tra infinidos populos paganos.

De sos Gregos no s’isetten isperos

d’Europa sos piagherei hat lontanos

ma, ruinas movet cand’ iss’est opressu

fraighende donzi tumba cun cipressu.

 

XXVI.

Antiochia, Persu e Turcu (illustre sonu

magnificos de lumine e de cosas)

no arte nostra ma de chelu donu

già sunu binchidas meravizzosas

fini, mujadas in su malu e bonu

contr’a su fine ‘e s’altu maestosas,

timo, chi briva e atzantarada zente

giaros rimbumbos a fine divente(t).

 

XXVII.

Pro Deuas no siant mai aggradessidos

donos, ch’a usu reu totu diffundat

a cussos, chi altos prinzipes ordidos

de s‘obera, chi a sa fine rispondat.

Como chi passos mannos sun bessidos,

como chi s’istajone hamus segunda

curremus tando a su dovere nostru

chi est pronta sa vittoria ‘e Babbu Nostru.

 

XXVIII.

Prinzipes bos protesto ( e i sos protestos

intendere hat su mundu ‘e su futuru,

intendan puru in chelu, anghelos mestos):

Su tempus de s’impresa est già maduru

est s’ora como de nos mover lestos,

inzertu fit su chi como est seguru.

Movide in presse e no a lentu cursu

prima chi Egittu giamen a succursu.

 

XXIX.

Cuncordos pro ‘ideas de assimizu

assensu deit Pedru s’eremita

ch’in privadu fit settidu a cunsizu

chi preigheit sa gherra beneitta.

Sa veridade est nada e dao cunsizu,

duda peruna, in su chelu est iscrittu.

In nome ‘e Deus s’abba Santa ispalgo

bois approade, custu solu annango.

 

XXX

Si ‘ene coglio discordias e ontas

gasie fattas in proas pattidas

diversos pareres e sas no prontas

in mesu a tantas obras impididas,

s’impidimentu chi pro tantas bortas

ponzende timorias nd’hamus bidas

ca pro s’autoridade in medas cosas

pro resessida fin perigulosas.

 

XXXI

In ue no b’hat ch’ imperet de offisciu

pendat dapoi de premios e de penas,

divisa siat d’onz’opera a giudisciu

si b’hat guvernu cun sas manos lenas,

faghide corpus unu chena visciu

aunende appare sas forzas amenas.

Dade s’iscettru a unu e sa potenzia

chi dignu siat de re e de sembianzia.

 

XXXII.

Cale pensieru in animos chietos

sunu, Sant’Aura e divinu Ardore?

De s’eremita ispira sos cunzettos

chi imprimidos sian cun onore,

no brivos de cunsizos e affettos

postos in altu in libertade e amore.

E chi Guglielmu e Guelfu pro istimas

giamen Goffredu, Duce de sas primas.