Feb
06
2015

B'AIAT UNA 'OLTA

Scritto da Salvatore
PDFStampaE-mail

B'AIAT UNA 'OLTA

Proite, ma proite sas paristorias
aian sempre su profumu
de rios e de montes,
de tancas e de mandras?

B'aiat una 'olta una mundu
chi pius no resesso ad agattare
ma, remonidu restas in profundu
cuadu in velos de ammentos:
sos contos cuados
in sa falditta niedda de minnanna,
sa sedattajola de mamma mia,
sa falche messadora de babbu meu,
sos ojos giaros e chietos
e s'ora de sa sera sonnigosa
accultzu a su foghile
a intender' contos de janas,
de vindittas, orcos, istrias e majalzas.

E puru sas nottes isteddas
de s'istadiale profundu
cun sas cadreas in sa carrera,
sas burulas e-i sos risos,
sos giogos e sos contos
e mamma nostra chi a 'istentu
nos poniat a fortza in su lettu
cun sas cristas limpias
ancora pienas de istellas,
cando galu no b'aiat timorias,
ne maladias e nen dolores,
ancora cuntemplende sos fogos
allutos in sos montes
cun sas umbras rujas
e sagumadas de calvonalzos.

B'aiat una 'olta
unu mundu fuidu,
como chi ch'amus cunzadu
in carchi buscia de plastica
totas sas paristorias
mudadas in pedras.

Restat su risu ranchidu
chi su tempus nou nos est regalende.