Nov
03
2014

ITE PIUS POTO DARE

Scritto da Salvatore
PDFStampaE-mail

ITE PIUS POTO DARE

 

Ite pius poto dare como a mannu

si no carchi versu

barriu de amore o de amargura

fuidu da-e mente mia

e a bortas imboladu a s'iscabada.

 

S'an'a perder' sos versos mios

in trobojados caminos de mundu

senza toccare fundu

o accabidados pro accasu o sorte

dai chie ch'in su profundu

at sos matessis pensos e ojos mios.

 

Ite poto dare a su mundu de sos bios

miseru poete chi so 'eo

si no un'abboju de sentidos

a chie chi m'assimizat

e bisat frinas amorosas de recreu.

 

Emmo...aia cherfidu dare:

accumassos de durches isperas,

muntones de disizos mancados,

incunzas d'ermosura

e ispannare chelos abbolotados

pro chi torret serenu.

 

Ite pius podet dare de abberu

custa mente mia istracca

si no sentores de paghe e de cunsolu,

un'isalenada de aria noa,

unu carignu a coros in tristura

e una giae ch'ispalanchet

mentes cunzadas

in serentes lacanas de mundu.

 

Ite podet pius de custu

unu triste poete vagabundu

ch'imbolat versos chen'ascultu

bettados a su 'entu?

Mudu no poto istare e offerzo

calchi paraula dechida

a bendidores de delirios

e a usurajos de animas a riscattu.-