Gen
28
2014

IN CUSTU MODU 'EO

Scritto da Salvatore
PDFStampaE-mail

IN CUSTU MODU 'EO

Attraesso sa vida
cogliende 'onzi pibida
mandigo pane e fele
durches licores buffo e assaboro
e ranchidu velenu
e mi mancat s'alenu
e cheria ma no poto
e poto ma no cherzo.

Affutidinde naro carchi 'olta
ma sa cuscenscia giamat su dovere
s'onore no est paza
sa vida est pellegrina
pellegrinu est su coro
chi curret in sos caminos
de pura fantasia...
curret sa mente mia.

Vagabundu de nues e chimeras
in durches aereas.
E sonnio, sonnio galu
de esser carchi cosa
ca sonniare est gratuidu
e no mi costat nudda.
E m'isfino melmos e meudda
succuto, rio e brinco
ca curro pussighende sa vida
fin' a sa prossima frimmada.

E mi frimmo istraccu
isalenende in tota sa carena
mi parfo carre anzena
chi no mi cumpetidi
e lasso, lasso andare
ue cheret su destinu
e galu torro a currere
mi frimmo calchi 'olta
pro pregare e pedire peldonu.

Abbandono sa mente a sa memoria
penso a su 'enidore.
Ma proite, naro e mi pregunto?
Ma proite so 'iu
e amo sa vida e s'amore
amo 'onzi fiore e sa poesia
e sa musica mia.
e su pianu meu
e sa chiterra chi est cumpanza mia
su clarino meu
chi no isco sonare,
pintare calchi 'olta unu quadru.

Dai sempre timo su dolore
godimentu m'est sa bellesa,
recreu mi dat reposu,
pensamentu s'affannu,
tristesa sa malesa,
cuntentu s'allegria.
In custu modu 'eo mi sento 'iu.