Gen
28
2014

SES TUE SARDIGNA

Scritto da Salvatore
PDFStampaE-mail

SES TUE SARDIGNA

Ses tue Sardigna male e bene meu
chi che fada mi nd''enis ammajendemi
mi leas in sos bratzos e mi naras:
"Ajo a sos logos de sa memoria
ad ammentare ammentos dulches,
a ti fagher' ninniare in consolu
in cussos laccos mai ismentigados,
a bentulare sos chizos tuos istraccos,
a ti pasare a s'umbra 'e sos suerzos
e a t'imberghere in sas abbas cristallinas.

A currere ancora in cussas tancas fioridas
e in sos padros indeorados da e s'estiu."
E ancora mi turmentas e mi cumbidas
gasi, faeddendemi a s'iscuja.
" No t'ammentas cando in su suberanu silentziu
mirende sas mudas pedras
de sos montes chentza tempus,
ti frimmaias cun sa mente assustada
a cuntemplare severas isculturas
chi omines parian' cun berritas
e caras alvudas e solennes?
E cussas frommas de antigas mamas
cun sa mantiglia niedda cuguddadas
chi preghende pariana
a sos mortos mai nados?"

'Eo miseru ti prego...cara e istimada terra,
no mi nd''enzas piedosa cun triste nostalgia
a turmentare sa trizile mente isconsolada.
Lassami in paghe a sighire a imbetzare
in custu anzenu logu chi ad amare no resesso.
Proite galu mi das pattimentu e dechida
mi trajinas peri sos caminos birdes de sa mente,
in ue, fozudas e pedrosas chijuras
intritzadas cun filiferru ispinosu
mi tenen frimmu...cun su piantu in su coro.