Gen
27
2014

TEJAS DE AMORE

Scritto da Salvatore
PDFStampaE-mail

TEJAS DE AMORE

 

E benit sa notte chen'istellas

cun su serenu nuosu che peumbu

a iscurigare pelcias de esistenscia,

ora de pensamentos e de lettu

bramosu de assentu disizzadu.

In unu cuzolu arrumbo su chelu,

in s'ateru, s'iscurigore de sa notte,

mi mancat unu sognu e carchi bisu.

 

Ma intantu aisettende mi pregunto

si de abberu so unu poeta

perdidu in semidas chentza fine

in ue naschere no podet s''enidore

e mi sero comente sole chi morit

in s'intrinada sonnigosa

subra una manta tramada

de isperas carrarzadu.

 

Ohi!!! chentza lunas est su tempus

cun sas umbras cuadas in su nudda,

e deo, che rusignolu intzegadu

in debbadas chirco su nidu

e barriu de isperas sigo

a cantare s'attunzu de sos annos

madurados in tejas de poesia.