Gen
17
2011

SA TZICA ISCHERVEDDADA

Scritto da Salvatore
PDFStampaE-mail

 

SA TZICA ISCHERVEDDADA

 

Como chi sunu passados guasi chimbant’annos e su reatu est andadu in prescrizione, nudda m’impidit de confessare una culpa, seguru chi a custu puntu chi su parentadu no mi podet pius pedire sos dannos.

A sos tempos de cando andaia ancora a sas elementares, sos cumpanzos mios de iscola no bidiana s’ora de arrivire sas vacanzias e sos chi fini approvvados, [ chi a bortas fini pagu pius de su mesu], fini già seguros de andare a Limbari a su friscu, ca in cussa orta b’haiat paritzas barraccas attrezzadas pro che passare unu pagu de ferias.

A mie , puru essende istadu sempre approvvadu, custa suddisfascione m’est istada sempre negada, siat proite no haimus sa baracca, siat proite bi pensaiat colzu babbu meu

a mi programmare s’istadiale.

Pro prima cosa mi mandaiat a tentare sas arveghes de tiu Ziromine Orgolesu e posca a tentare sas binzas pro sa puzzonina. E fit propriu in cussas binzas e tancas de Contraporcarzos chi che passaia s’istadiale in cumpanzia de un’ainu e de chentutrintaduas arveghes. S’ainu che l’imbroccaia chena mancu che li leare sa sedda, ca essende tantu minore a bortas no bi la faghia a che la pesare, [ otto annos no fini meda], e cando carchi orta su burricu s’imbroscinaiat cun tota sa sedda, fit unu disastru

ca ch’andaiat a finire sutta a sa matta pendutone cun sa letranga subra a s’ischina. Una orta no bi la fattesi a che la torrare a postu e benzesi a bidda a caddu su matessi ma cun sa sedda ortulada.

Sas arveghes no fini malas, ma bi nd’haiat una chi no arresettaiat in logu perunu, e cando si tuccaiat in logos chi no podiat andare, totu sas ateras li ponian fattu, ed ‘eo a currere comente unu maccu pro che las torrare a recuire. Ma cudda tzica, a sa girada de s’oju si torraat a tuccare a nou.

Una die chi no resessia ad adattare paghe, sempre pro culpa de cust’arveghe iscalmanada, leesi unu crastu e bi l’iscudesi dai una distanzia de chimbe o ses metros, e mancu a lu fagher apposta la leesi a mesu de cherveddos, e mischina si faleit a fronda.

A essere unu pagu sinzeru fia guasi cuntentu de l’haer dadu una bella lezione, ma cando ‘idesi chi no si nde pesaiat piusu dai terra, incominzesi a mi preoccupare. M’accurziesi pro bidere ite li fit suzessu e la ‘idesi a limba a fora, tota piena de bae e de sambene.

Morta?… Chirchesi de nde la pesare, nudda, fit morta de abberu.

M’incominzeit sa tremula e isbrocchesi in una matta de piantu, pedendeli a modu meu perdonu. Cun totu sas forzas chi haio che la trajinesi attesu cuendecchela intro de una tuppa e carrarzendela cun tota sa frasca chi resessesi ad agattare.

E como? – Comente bi lu conto su fattu a tiu Ziromine?

A s’icurigada tiu Ziromine ‘eniat sempre e che truvaimus sa roba intro de un’ateru tanchittu, isse si poniat addainanti a sa jaga e una orta a sa chida a mamu a manu chi sas arveghes intraiana, isse las contaiat una a una. “ Dami una mano Toreddu chi onzi tantu carchi una mi la codio”. Fineit de las contare e s’abbizzeit chi nde mancaiat una. “ E tue cantas nd’has contadu?”. Mi frimmesi un’iscuta a pensare e cun una calma chi creio de no haere, “ eo una de piusu, chentutrintatrese. Pro fortuna chi fin sas ultimas dies de su tentorzu, no las torreit a contare e de custa cosa no si nde faeddeit piusu. Cando si nd’abbizzeit posca de carchi chida, deit sas culpas a carchi matzone o a carchi brancu de canes randagios inarestidos.

Sempre in cussu logu pro mi poder reparare dai su sole, mi fia fattu una barracchedda de frascas e de cannas, tantu bascia chi a sa ritza no resessia a b’istare, b’haia postu una pedra pro settidorzu e unu roccu in su muru in ue b’appiccaia su tascapane cun s’ustu. Una die andesi a leare su tascapane cun s’intentu de ‘ustare, e b’agattesi una colora manna allorigada intro su tascapane ma cun sa conca a fora. Cando m’accurziaia cun unu fuste, pro che la fagher andare, issa si nde pesaiat ritza, a limba saettante pronta a mi s’iscudere a dossu. No b’happeit manera de che la fagher andare, tantu chi sa die la passesi a iscaluzzeddas de ua e una deghina de pirastros tostos che i sa balla.

Un’atera orta sempre in su matessi logu, dai sa paura mi che fuesi e andesi a pedire aggiudu a carchi unu. Su primu chi agattesi fit unu zertu tiu Caccianni. “ E ite b’hada “ mi neit, bidendemi in affannos. “ In cue subra, in daisegus de unu ozzastru b’hat unu chi m’est fattende a timire, est dai pius de un’ora chi mi faghet…cugu…….

cu… cugù …cu… cugù… cu… In presse tiu Caccianni leeit sa istrale e curreit a su logu umpare a mie. Posca de unu paju de minutos cominzeit de nou cuddu cugù… cu…cugù… cugù … cu. Tiu Caccianni si ponzeit a riere, iscudeit una pedra in mesu a s’ozzastru e subitu si che ‘oleit unu columbone.

“ Bidu l’hasa chie fidi su mostre chi ti faghiada a timire?.-