Gen
07
2011

PEDRU JOGA

Scritto da Salvatore
PDFStampaE-mail

PEDRU JOGA

 

Una olta no fit comente como, sas familias fini numerosas e carchi una arriviat a faghere una vintina de fizos. Una de custas fit sa famiglia de unu zertu Pedru Joga, chi tra mortos e bios de fizos nde fatteini vintitres. Proade a immaginare atempos de oe, de amministrare una vintina de fizos cun totu sos sacrifizios chi cumportana, da e su mandugu a sa ‘estimenta. Pensade a sas battazzas e ispesas pro lo poder mandare a istudiare. Pedru a modu sou bi poniat totu s’impigno, ma carchi ‘olta no sempre li resessiat e namus puru chi una olta chi haiana imparadu a leggere e iscriere, sos fizos de Pedru lassaiana s’iscola pro andare a tribagliare.

Sa mastra de iscola continentale arriveit a bidda propriu in cussas dies chi Pedru haiat sa muzere chi si fit iglierende e cun sa mastra de partu in domo, e mancu a lu fagher apposta, cussa fit s’ultima die ‘ona pro poder annotare sos fizos a s’iscola.

Pedru haiat già battordighi fizos cun deghe meses de differenscia unu da e s’ateru

e fit già dai noe annos chi los iscriiat a sas elementares. A narrer sa veridade, fit sa muzere chi onzi annu, raida manna, cun unu fizu in bratzos, unu a manu a manu e ateros duos o tres infatti, si leaiat sa briga, ca solu issa teniat a mente s’edade e sa classe de sos piseddos. Cussa olta no bi poteit andare e tando toccheit a Pedru s’ingarrigu gasi delicadu. E isteit gasi chi Pedru leeit unu fizu pro andare a l’iscriere e pro faeddare cun sa mastra. Sa mastra chi naturalmente faeddaiat solu in italianu, dimandeit su chi cheriat ischire. Pedru chi no cumprendeit mancu mesa paraula in cussa limba, isteit mudu, e su fizu crettende chi sa pregunta fit pro isse, neit su lumine sou, “ Joga Giovanninu”. Sa mastra iscrieit su lumine in su registru e torreit a pregustare, “nato?” Pedru chi cumprendeit su chi cheriat ischire sa mastra e bidente chi Giuanninu no abberiat bucca,dimandeit a Giuanninu; “ Ajò Giuanninu, narali a sa mastra cando ses nadu”. “ No l’isco babbu cando so nadu”, rispondeit su fizu. “ Comente no l’ischis” li neit cun severidade. Gianninu a cussu puntu si ponzeit a piangere. “ Chi iscujet sa mastra, devia esser ‘eo a tenner a mente cando sunu nados, ma sunu meda e no poto pensare a totu,

su tribagliu, sas crabas, s’allevamentu de sos caddos, a creschere sos fizos e ateras tribulias, e como mi mancaiat solu custu segamentu de matta”. Frimmeit de faeddare proite li fit bennidu su dubbiu chi sa mastra no haiat cumpresu mancu mesa paraula de cussu chi haiat nadu. “ Dai Giuanninu, possibile chi tue no iscas cando ses nadu”. “ Nono babbu, fia troppu minore e no mi nde poto ammentare”. Disperadu Pedru pregunteit a sa mastra; “ Signora mastra, cantos annos bi cherene pro bennere a iscola?”

Nisciuna risposta e tando Pedru cun totu s’italianu chi resesseit a ponner appare, torreit a pregustare: “ Canti anni per andare a scuola ci servono?” Sei, rispondeit sa mastra. “ Oh… bidu l’has Giuannini chi semus a bonu puntu, tue has ses annos e como benis a iscola. Anzis , como mi suvenit chi tue ses nadu posca de Bustianeddu, e no hamus sempre nadu chi tue has un’annu in mancu de isse? Duccas , Bustianeddu est nadu in su matessi annu chi nascheit Trottolina, sa calarina baja, e como m’ammento chi sa die haimus sa mastra de partu in domo e su veterinaju in su tanchittu, e sigomente Trottolina hat ses annos… tue nd’has… chimbe…, chi iscujet sa mastra, no est custu, bidu l’has chi mi fio isbagliende e tue no mi naras nudda Giuanninu, est Bustianeddu cussu de notare”. Pedru leeit berrita e Giuanninu e torreit a domo a cambiare fizu.-